Uhuru Kenyata oo iminka sheegay in Soo afjareen Weerarkii Hoteelka lagu qaaday

0

Madaxweynaha Kenya, Uhuru Kenyattta ayaa sheegay in weerarkii dhimashada lahaa ee lagu qaaday dhisme hotel iyo xafiisyo oo ku yaalla magaalada Nairobi uu soo geba-geboobay.

Khudbad uu u jeediyay qaranka, ayaa Kenyatta waxa uu ku sheegay in 14 oo shacab ah lagu dilay weerarkan lagu qaaday dhismaha DusitD2, halka 700 oo qof ay soo bad-baadiyeen ciidamada amniga.

Kenyatta waxa uu sheegay in dhammaan “argagixisadii” ka qeyb qaatay weerarkan “laga taqalusay”

Waaxda arrimaha dibedda Mareykanka ayaa sheegtay talaadadii in qof Mareykan ah uu ka mid ahaa dadka lagu dilay weerarka, hase yeeshee ma magacaabin dhibanahan. Muwaadin British ah ayaa sidoo kale lagu warramay in weerarka lagu dilay.

Kooxda Al-Shabaab ayaa sheegatay mas’uuliyadda weerarka oo galabnimadii talaada ku bilowda qarax is-miidaamin ah oo lagu qaaday albaabka hotelka.

Kaamirooyinka amniga ayaa laga arkay afar nin oo hubeysan oo hotelka-galaya.

Warbaahinta maxalliga ayaa ku warrantay in afar dabley ah ay ka dambeeyeen weerarka.

Waxaa ay baraha bulshada soo geliyeen muuqaal ay duubtay Kameerooyinka ammaanka oo muujinaya dableyda oo galaya dhismaha.

Hotelka DusitD2 iyo dukaamada ayaa ku dhex-yaalla dhismaha la weeraray ayaa ah goob caan ah oo ay ka adeegtaan dadka dalxiisayaasha ah ee ka yimaada, Mareykanka, Yurub iyo India.

Kooxda Al-Shabaab ayaa bishii September ee sanadii 2013 weerartay suuqa Westgate ee Nairobi, halkaasi oo ay ku dishay 67 qof.

Waxaa xarunta la dhigo maydadka ee Chiromo ee ku taalla magaalada Nairobi jooga dad badan oo raadinayo qarabadooda ama ehelkooda maqan xilli galbeedka Nairobi uu ka dhacay weerar ay ku dhinteen 14 qof, sida ay sheegtay dowladda Kenya.

Meydadka dadkii ku dhintay weerarka ayaa waxaa la geeyay xarunta Chiromo halkaas oo ay laga raadinayo.

Dadka ku dhintay weerarka waxaa kamid ahaa dad soomaali ah.

Ha’yadda laanqeyrta cas ee Kenya waxay sheegtay in ugu yaraan 24 qof ay ku dhinteen weerarka ka dhacay magaalada Nairobi.

Madaxweynaha Kenya Uhuru Kenyatta wuxuu sheegay in 14 qof ay ku dhinteen weerarka.

Madaxweynaha Kenya Uhuru Kenyatta ayaa sheegay in lasoo afjaray howlgalka ka dhanka ah weerarka lagu qaaday huteelka DusitD2 oo ku yaalla galbeedka magaalada Nairobi.

Kenyatta wuxuu sheegay in 14 qof ay ku dhinteen weerarka.

Wuxuu sheegay madaxweynaha in la laayay dadkii weerarka soo qaaday.

Madaxweynaha Kenya ayaa amaanay sida degdeg ah ay laamaha ammaanka Kenya uga falceliyeen weerarka.

Muwaadiniin shisheeye oo ku dhintay weerarka

Dadka ku dhintay weerarka waxaa kamid ah 2 qof oo uu kala dhalatay dalalka Mareykanka iyo Ingiriiska, sida uu wakaaladda wararka ee Reuters u sheegay mid kamid ah dadka ka howlgala xarunta meydadka la dhigo ee Chiromo.

Wuxuu intaasi ku daray in 11 qof ay u dhasheen dalka Kenya.

Saraakiil dowladda Mareykanka ka tirsan ayaa xaqiijiyay in muwaadin u dhashay dalkaasi uu kamid yahay dadkii ku dhintay weerarka.