Mid Kamida Ilaaliyaashii Cusama Bin Ladin oo Jarmalka Qaxooti Ahaan Ugu Nool iyo

0

Nin u dhashay dalka Tunisia oo la sheegay in uu ka mid ahaa dadkii waariyayn jiray hoggaamiyihii la dilay ee Alqaacida Usama Bin Laden ayaa la sheegay in uu muddo sanooyin ah ku noolyahay dalka Jarmalka, kana qaato lacagta daryeelka dowladda.

Bishii waxa uu helaa €1,168 oo lacagta Yurub ah, wuxuuna dalkaas ku noolaa laga soo bilaabo sanadkii 1997-dii.

Lacagtan ayaa lasoo bandhigay kadib markii xisbiga fog ee AfD uu dowladda ka codsaday in ay shaaciso lacagta uu helo ninka oo loo yaqaano Saami A.

Warbaahinta Jarmalka ayaanan faafin magaca ninkan oo dhamaystiran si loo illaaliyo xogtiisa shaqsiyadeed.

Bin Laden ayaa hoggaaminayay ururka Al Qaacida, isaga oo amray weerarkii lagu qaaday daaraha dhaadheer ee Maraykanka sanadkii 2001-dii.

Ninkan mar ahaan jiray waardiyaha Bin Laden ayaa la baaray sanadkii 2006-dii, balse ma jiraan wax dacwado ah oo lagu soo oogay.

Waxa uu la noolyahay xaaskiisa oo Jarmalka u dhalatay iyo afar carruur ah, isaga oo degan magaalada Bochum.

Codsigiisa magangalyo doonimada ayaa la diiday sanadkii 2007-dii maadaamaa dowladda u aqoonsatay in uu yahay halis amni.

Balse sidaas oo ay tahay lama tarxiilin baqdin laga qabo in marka Tunisia lagu celiyo in la jir dilo.