Madaxweynaha Maraykanka Donald Trump ayaa ku boorriyay Xisbiga Jamhuuriga ee Kongareeska inay u codeeyaan in la sii daayo faylasha fadeexadda ah ee la xiriira Jeffrey Epstein – arrin si lama filaan ah uga soo horjeedda mowqifkiisii hore oo uu ku diidanaa dadaallada lagu doonayay in faylashaas lagu shaaciyo.
Jeffrey Epstein, oo geeriyooday, wuxuu ahaa maalqabeen Maraykan ah oo lagu xukumay dambiyo la xiriira kufsiga carruurta. Waxaa laga helay isagoo dhintay qolka xabsiga sanadkii 2019 xilli uu sugayay maxkamad kale oo ku saabsan dambiyo ka ganacsiga dadka.
Epstein wuxuu xiriir dhow la lahaa dad caan ah oo ay ku jiraan siyaasiyiin, aqoonyahanno iyo ganacsato. Wuxuu hantidiisa iyo saameyntiisa u adeegsaday inuu si galmo ah u xadgudbo oo u ka ganacsado gabdho yar yar, iyadoo uu ka caawinayay saaxibtiis muddo dheer, Ghislaine Maxwell.
Trump wuxuu wajahayay suurtogalnimada kacdoon siyaasadeed, kadib markii tiro badan oo xildhibaanada Jamhuuriga ah ay muujiyeen inay u codeyn doonaan sii daynta faylashaas, inkastoo uu hore uga soo horjeeday.
Inkasta oo la filayo in hindisaha sharci uu ka gudbi doono Aqalka Wakiillada, haddana weli lama hubo inuu ka gudbi doono Senate-ka oo ay Jamhuurigu maamulaan.
Xitaa haddii uu ka gudbo Senate-ka, wali ma cadda goorta faylasha la sii deyn doono iyo in sii dayntoodu ay ku qanci doonaan shacabka doonaya in la shaaciyo.
Isniinta, Aqalka Wakiillada ayaa la filayaa inuu u codeeyo sharci ku qasbaya Xafiiska Xeer-ilaaliyaha Guud inuu 30 maalmood gudahood ku sii daayo dhammaan faylasha la xiriira kiiska Epstein.
Dhibanayaal badan oo ka tirsan kuwii uu Epstein dhibaateeyay ayaa sidoo kale la filayaa inay maanta tagaan Capitol Hill, si ay u taageeraan ansixinta sharciga, sidoo kalena waxay qaban doonaan shirar jaraa’id.
Trump wuu ka laabtay mowqifkiisii hore
Sii-daynta faylasha waxay sidoo kale ka mid noqon kartaa dukumeentiyo la xiriira hadalladii ay bixisay Ghislaine Maxwell, oo ahayd ku-xigeenkii Epstein, iyo sidoo kale mas’uuliyiin dowladeed oo lagu magacaabay dacwadda.
Codbixintu waxay imaanaysaa labo maalmood uun ka dib markii Trump uu bartiisa Truth Social ku qoray farriin uu ku ku boorrinayo Jamhuuriyiinta inay u codeeyaan sii-daynta faylasha. Qoraalkiisa wuxuu ku sheegay in “aan waxba aanu qarinayn”.
Kahor hadalka Trump, qaar ka mid ah Jamhuuriyiinta Kongress-ka ayaa cadeeyay inay diyaar u yihiin inay ka horyimaadaan madaxweynaha iyo Afhayeenka Aqalka wakiillada, Mike Johnson, si ay ugu codeeyaan haa.
Haddii uu hindisuhu meel maro, weli mustaqbalkiisu ma cadda marka uu gaaro Senate-ka, kaas oo aan xitaa lagu qasbanayn inuu u codeeyo.
Weli lama oga haddii Hogaamiyaha Aqlabiyadda Senate-ka, John Thune, uu oggolaan doono codbixinta – balse Jamhuuriyiintu waxay wajahaan cadaadis xooggan oo ka imanaya labada xisbi ee Mareykanka.
Wuxuu horay u sheegay inuusan “arkin” xiiso badan oo ay xubnaha kale ee Jamhuuriyiintu u qabaan riixista sii-daynta dukumeentiyada. Laakiin khubaro ayaa sheegaya in codbixinta Aqalka wakiillada ay arrinta beddeli karto.
“Waxaan rajaynayaa in John Thune uu sameeyo waxa saxda ah,” ayuu yiri Thomas Massie, oo u warramayay ABC News dhawaan.
Sidoo kale John Barrasso, oo ah Senator Jamhuuri ah, ayaa u sheegay barnaamijka NBC ee “Meet the Press” in Senate-ku “baari doono” hindisaha haddii uu maro Aqalka wakiillada.Â
Epstein wuxuu xiriir dhow la lahaa dad caan
Kaliya kadib marka Senate-ku ansixiyo biilka ayuu u gudbi doonaa Madaxweyne Trump, oo sheegay inuu saxiixi doono si uu sharci u noqdo.
Si kastaba ha ahaatee, waxaa jira xayiraado ku saabsan faylashaasi xitaa haddii la oggolaado in la sii daayo.
Tusaale ahaan, kiisaska u gudba Kongarayska, Xeer-ilaaliyaha Guud wuxuu qarin karaa ama ka saari karaa qaybo ka mid ah diiwaannada ay ku jiraan macluumaad shakhsi ah oo “si aan macquul ahayn ugu bandhigi kara dadka.”
“Daahfurka wax walba wuxuu muujin karaa macluumaad badan oo gaar ah oo aan habboonayn ama aan ku habboonayn in loo isticmaalo si guud,” ayuu Jonathan Entin, oo ah barafasoosharciga iyo dastuurka ka dhiga Jaamacadda Case Western Reserve ee Ohio, u sheegay BBC.
“Waxaa kaloo jiri kara arrimo la xiriira habraacyada sharciga oo xafiiska xeer-ilaaliyaha uu doorbidi karo inuusan dadweynaha la wadaagin,” ayuu ku daray.
Xafiiska xeer-ilaaliyaha gobolka sidoo kale wuxuu qarin karaa dukumenti kasta oo “halis gelinaya baaritaan dowladeed ama dacwad socota, ilaa qarinÂtaasi ay sharci tahay oo ku kooban tahay muddo xaddidan.”
Taasi waxay keeni kartaa dib-u-dhac, maadaama Madaxweyne Trump uu sheegay in uu doonayo baaritaan la xiriira eedeymaha ku saabsan xiriirka u dhexeeya Epstein iyo Dimuqraadiyiin caan ah sida Bill Clinton iyo Larry Summers, “si loo ogaado waxa socda.”
Barafasoor. Entin wuxuu yiri: “Haddii baaritaan noocaas ah la sameynayo, dacwad-oogayaashu ma rabaan in wax walba la shaaciyo, iyagoo weli qiimeynaya inay soo oogaan dacwad ama aanay soo oogin.”
Kuwa muddo dheer u ololeynayay in faylashu la sii daayo, wax kasta oo aan si buuxda loo shaacin karin waxay u badan tahay inay keento su’aalo dheeraad ah, xitaa xanaaq.
