Madaxda Dowladda Libya ee ay QM taageerto ayaa sheegay in Markabkaasi lagu qabtay meel ka baxsan Xeebaha magaalladda Misraat ee Galbeedka dalkaasi.
Markabkaasi oo lagu magacaabo Shahar E Kord waxa uu isbuucii hore ka soo shiraacday Dekedda magaalladda Burgas ee dalka Bulgaria, wuxuuna ku wajahnaa Dekedda magaalladda Misraata.
Wasaaradda Arrimaha Gudaha ee Dowladda Libya ee ay QM taageerto ayaa sheegtay inuu Markabkaasi waday 144 Kontaynaro ay ka buuxaan noocyadda Hubka kala duwan, oo isugu jira kuwa fudud iyo Sawaariikhda.
Dhinaca kale, Afhayeenka Ciiddanka uu hoggaamiyo Khaliifa Xaftar ayaa sheegay inuu Markabkaasi hub u waday Dowladda Libya ee fadhigeedu yahay Tripoli.
Markabkaasi oo la sheegay inay Ciiddanka Ilaaladda Kacaanka Iiraan leeyihiin waxaa horey cunaqabatayn ugu soo rogay Dowladaha Maraykanka iyo kuwa Midowga Europe, iyagoo ku eedeeyey inuu Markabka qeyb ka ahaa Hawlaha Barnaaamiojka Nukliyeerka Iiraan.
