 |
Qormadaydii shalay, waxaan kaga hadlay Siyaasiyiinta ba’nanka ah ee maanta ku legdemaya inay madaxweyne Siilaanyo ka duumaalaan xisbiga Kulmiye , iyagoo hamigoodu yahay inay uga sii talaabsadaan qabashadda Kurisga ugu sareeya Majaraha dalka oo ah kurisga Madaxweynanimo, waxaynuna qormadaas ku xusnay shanta ugu cadcad, oo mid waliba isu dhigay inuu yahay kii ugu haboonaa, iyagoo aad moodo inaanay isu miisaamin hankooda shakhsiyadeed, baaxadda Kursiga iyo Shuruudaha laga doonayo cidda u hanqal-taagaysa hanashada kursiga madaxweynenimo, raggii aan qormadaydaas ku xusay waxaa ka mid ahaa, Muuse Biixi Cabdi, Maxamed Biixi Yoonis, Hersi Cali Xaaji Xasan, C/casiis Maxamed Samaale, iyo Maxamuud Xaashi Cabdi, hadaba, maadaama, waxa aynu ka hadlaynaa ay tahay Hugaamintii Masiirka
Umadda iyo dalka, umad ay la degtay qabyaalad, Musuqmaasuq, shaqo la,aan, dhaqaale xumo, tahriib, kala qaybsanaan reernimo ku salaysan, iyo rajo xumo nololeed, taasoo ubaxeedii (Dhalinyaradeedii) uu baddaha isku gurayo isagoo nolol doon ah, una ooman inay si uun, iyo mar uun uga diga-rogato nolol tan uga door roon, ayaa waxaa muhiim ah in qalinka la dultaago cid kastoo usoo ban-baxda hanashadda halka ugu saraysa talada dalka, anigoo qormadayda maanta ku berdaaminaya labada siyaasi ee u kala sharaxan labada xisbi ee WADANIi iyo UCID, oo kala ah, C/raxmaan Maxamed C/lahi (Cirro) iyo Jamaal Cali Xuseen.Haddii aan kala qaado, siyaasiga C/raxmaan Cirro oo ah nin in door ah kusoo dhex-jiray Diblumaasiyadda Caalamka, kana soo nqoday Safiiro wadamo kala duwan oo dunida ka mid ah xiligii ay Jirtay Dawladdii dhexe ee Somaaliya, isla markaana soo hugaamiyay 10-kii sanadood ee u danbeeyay Golaha wakiiladda Somaliland, wuxuu u muuqdaa nin inta kale ka khibrad roon, marka laga hadlayo dhinaca shaqada iyo mihnadda diblumaasiyadda, balse aan lahayn xirfad hugaamineed oo la majeeran karo, sababtoo ah, waxaa tusaale inoogaga filan sida uu u hugaamiyo golaha wakiilada, oo u muuqda gole markasta kala jabsan oo aan isku san banaanayn, waxaa markasta liicsan xdhiidhka ka dhaxeeya isaga iyo ku xigeenadiisa, tusaalaha labaad ee aan soo qaadan karaa wuxuu yahay, hugaaminta xisbigiisa, waa xisbi u muuqda in ciddii doontaaba ay afkiisa ku hadli karto iyadoo aan eegayn siyaasadda iyo manhajka xisbigaasi leeyahay, mararka qaar waxaad arkaysaa isu-imaadyo xisbiga WADANI samaynayo, oo khudbadaha halkaas laga samaynayo aany isla haysan, qaar baa reer gaar ah weeraraya, oo xukuumadaba qolo u haysta, qaarbaa xukuumadda talada haysa weeraraya, iyadoo aanad arkayn hugaan wax saxaya oo halkaas kaaga muuqda, waxaa kaloo dadka u dhuun daloolaa arimaha xisbiga WADANI ay sheegaan in shirweynihii xisbigu ilaa iyo hadda u qabsoomi la’yahay kala qaybsanaan xisbiga dhexdiisa ah, iyo cabsi uu gudoomiyuhu ka qabo inay shirweynaha kazoo dhex baxaan cid han leh oo hugaanka xisbiga ku qabsata, amaba isla sharaxda, arimhan oo dhan markaynu eegnana, hanka Madaxweynanimo ee C/raxmaan Cirro wuxuu inooga dhigan yahay, odhaahdii Soomaaliyeed ee odhan jirtay, Somaalidu ninka ay adhiga kala quusato ayaa ay geela u dirataa, oo macnaheedu yahay, C/raxmaan Cirro oo hugaaminta Golaha wakiiladda iyo Xisbigiisa WADANi la daala-dhacaya, ayaa aynu rabnaa inuu qaran ahaan ina hugaamiyo, inagana saaro dhibaatada iyo waayaha aynu maanta qaran ahaan qabno.
Haddii aan u imaado, Murashaxa Jamaal Cali Xuseen, isagoo waa nin aqoon yahan ah, balse haba yaraatee aan lahayn wax khibrad iyo waayo-aragnimo siyaasadeed ah, waana mid ka mid ah Siyaasiyiinta ba’nanka ah ee kursigu u muuqdo, balse aanay u muuqan waayaha baaxadda weyn ee ku hareeraysan kursiga, waxaanan is leeyahay C/raxmaan Cirro iyo Jamaal Cali Xuseen midkoodna ma ahan kii dadkan ka saari lahaa waayaha ay qabto iyo duruufaha ku xeeran nolosheeda ee middaynta quluubta, caqliga, iyo xoogga bulshadda, la dagaalanka iyo tirtirida qabyaaladda iyo musuqmaasuqa, horumarinta dhaqaalaha bulshada iyo dalka, u abuurida rajo iyo yididdiilo dhab ah umaddan quusta ku dhow ee shaqo la;aanta iyo saboolnimadu la degtay, waxaanan kula talin lahaa labadoodaba inay nafahooda miisaamaan, oo ay barbar-dhigaana waayaha dalka yaala ee ay tahay inuu wajaho hugaamiyaha imanayaa, kadibna ay cid iyaga uga wanaagsan hugaaminta iyo horumarinta dalka u baneeyaan kurisga murashaxnimada, waa haddii lexlajeclada ay dalka ka qabaan ay kala weyn tahay tan ay u kurisiga hanashadiisa u qabaan.
Gunaanadkii, Akhriostow, waxaa laga yaabaa, inaad ii aragto nin u janjeedha dhinaca negatifka, markaad akhrisato labadaydan qormo, oo tidhaahdo, waar ninkani miyaanu cidba odhanayn way wacan tahay, waxaanse ku leeyahay haddii aad sidaas u fekerto waad saxan tahay, balse ogow, ilaa hadda waxaynu ka hadalay waa todoba qof oo iminka inoo taagan saaxadda siyaasada dalkeena, balse, waxaynu nahay umadd ay ku dhexjiraan rag badan oo rug-cadda iyo waayo-arag ah oo aynu ku aamini karo hugaaminta masiirkeena haddii aynu siino fursadii ay inagaga soo dhex bixi lahaayeen, kuwa maanta ina hortaagana aan u sheegno inaanay ahayn kuwii ugu mudnaa ee aynu aayaheena umadnimo ku aamini lahayn, oo aynu ku dhiirano inaynu ku nidhaahno MAYA, MAYA, MAYA ee iska nasta saaxiibayaal.
Wa Bilaahi Towfiiq
Qalinkii:- Hussein-Lucky Mohamed Mohamood
Burco,
Email, husseinlucky@hotmail.com
