Kuuriyada Koonfureed iyo Mareykanka ayaa sameeyey dhoollatuskii militari ee ugu weynaa oo sanado badan kaddib ka dhaca gacanka Kuuriya kaasoo ay sheegeen iney uga gol leeyihiin iney u diyaar garoobaan dagaalka uga iman kara dhanka Kuuriyada Waqooyi oo cadaawadda dalalkaasi uu u hayo ay sii xoogeysaneyso.
BBC-da waxay fursad naadir ah u heshay iney booqato xaruunta ciidamada wadajirka ee labada dal ay ku sugan yihiin. Haddaba maxay tahay ujeeddada ka dambeysa dhollatuskan ma dagaal ayuuse hurin karaa?
Xero militari oo ka baxsan Seoul, waxaa isgarab fadhiya laba Korneel oo ciidamada cirka oo ka soo kala jeeda Mareykanka iyo Kuuriyada Koonfureed.
Si wadajir ah waxay dhala weyn oo hortooda taalla ay ka fiirsanayaan sawirka qariidadda Kuuriyada Waqooyi oo dayaxgacmeed lagu soo qaaday. Sawirkana waxaa ku dhan macluumad sirdoon oo wakhti badan la geliyey.
Waxaan awood u leennahay gantaallada Kuuriyada Waqooyi isl-marki la soo rido inaan ogaanno,” ayuu yiri Korneel Anthony Kuczynski oo hoggaaminaya ciidamada dhoollatuska wada ee Mareykanka.
Xaruuntana Ciidamada Cirka Mareykanka ee Osan ayaa ah saldhig gaar ah oo ciidamada labada dal ay u wada difaacaan hal dal.
Taasoo ka dhalatay axdgi nabadeed uu Mareykanka la galay Kuuriyada Koonfureed 70 sano ka hor xilligi uu dhammaaday dagaalkii labada Kuuriya.
Ciidamada cirka, kuwa dhulka, kuwa badda, kuwa hawada sare iyo howlgallada interneetka intaba hal qol ayey ka wada howl galaan lagana maamulaa.
Toddobadkan ciidamada isku dhafka ee labada dal muddo afar sana kaddib waxay sameeyeen dhoollatus militari oo ku aaddan sida ay uga jawaabi karaan haddii weerar uu uga yimaaddo dhanka Kuuriyada Waqooyi.
Dhoollatusyadan oo ahaan jiray kuwa joogta ah waxaa la joojiyey 2018-kii xilligaas oo ay Mareykanka iyo Kuuriyada Waqooyi ay isku dayayeen iney Kuuriyada Waqooyi ku qanciyaan barnaamijkeeda Nukliyeerka iney wax ka baddasho.
Kuuriyada Waqooyi ayaa gantaalihii ugu badnaa sanadkan tijaabisay iyada oo inta badan gantaalaha ay tijaabisayna ay yihiin kuwo casri ah oo awood u leh iney burburiyaan bartilmaameedyadooda.
Dhanka kale, xogaha laamaha sirdoonka laga helayo waxay sheegayaan Kuuriyada Waqooyi iney iisu diyaarineyso tijaabadii toddobaad ee Nukliyeerka si ay hubkaasi ugu adeegsato haddii ay dagaal la gasho Kuuriyada Koonfureed.
Walaacaasi oo ka dhashay digniino isdaba joog ah oo oo dhawaan ka soo yeeray hoggaamiyaha Kuuriyada Waqooyi Kim Jong Un taasoo uu ku sheegay hubka Nukliyeerka inuu ku weerarayo Kuuriyada Koonfureed.
Dhoollatuska Mareykanka iyo Kuuriyada Waqooyi ay sida wadajirka ah u sameynayaan oo 9 maalmood soconaya waxaa ka qayb qaadanaya Diyaarado dagaal, maraakiib dagaal iyo taangiyo.
Wasiir ku xigeenka gaashaan dhigga Kuuriyada Koonfureed Shin Beomchul oo oo ka jawaabay eed Kuuriyada Waqooyi ay u soo jeedisay wuxuu sheegay dhoollatuskan miltari hadafka laga leeyahay inuusan ahayn mid horseedayo dagaal mustaqbalka dhaw lagu qaado Kuuriyada Waqooyi.
Sarreya Guud Scott Pleus oo ah madaxa saldhigga ciidamada cirka ee Osan wuxuu sheegay ujeeddada dhoollatuska miltari ee ay labada dal sameynayaan uu yahay mid lagu dhisayo awoodda militari ee looga hortagi karo weerarka ka yimaaddo dhanka Kuuriyada Waqooyi.
Seoul dhankeeda waxay ka digtay haddii ay Piyongyang ay isku daydo iney Nukliyeer tijaabiso ay jawaab adag ka bixinayaan.
Mareykankana wuxuu sheegay inuu diyaar u yahay haddii Kuuriyada Waqooyi ay tijaabadaa sameyso ay Kuuriyada Koonfureed u soo direyso Diyaaradaha dagaalka ee wax burburiyo iyo hub kale oo casri ah.
Kim Jong Un wuxuu Mareykanka iyo Kuuriyada Koonfureed uu ku eedeeyey iney gacacana Kuuriya “ay dagaal ka aloosayaan.”
Dhoollatuskan ayaa laga cabsi qabaa xiisadda gacanka Kuuriya inuu uga sii daro uuna horseedo iney Kuuriyada Waqooyi tijaabooyin hor leh oo dhanka hubka ah ay sameyso.
Halka Mareykanka iyo Kuuriyada Waqooyina ay aaminsan yihiin fursadda keli ah ee ay heystaan ay tahay iney isdhigan oo ay cadawgooda iisu diyaariyaan.
