Tuulada Kursi ee Degmada Wajeer, sida ay sheegtay Wakaaladda Adeegga Duurjoogta Kenya (KWS), qoys samejecle ah ayaa ayaa maan iyo bogaadin ku muteystay daryeelka bedbaadinta haramacad dhal ah oo ay meel cidla ka heleen, ka dibna ay si kalgacal leh u korsadeen muddo ku dhowaad laba sanoah.
,Qoyskaan Soomaaliyeed ayaa ku wareejiyay haramcadka Hay’adda Duurjoogta, ka dib baaritaan iyo daryeel caafimaad oo ay sameeyeen.
Bashiir Cabdi Xuseen oo ah aabbaha qoyska xannaaneeyey xayawaanka, ayaa dib u milicsanaya sida ay ku soo heleen haramcadka yar ayaa BBC-da u sheegay in laba sano ka hor ay ahayd markii ay qaar ka mid ah caruurtiisu ku arkeen duurka isaga oo baahi badani ka muuqato.
“Maalin maalmaha ka mid ah ayaa ilmo yar yar oo aan dhalay waxay igu dheheen aabbow meeshan bahal bakhti ah ayaa yaalla. Bahalkii sidaas markaan u eegeyba waxaan arkay bahalkan yar oo macluulsan oo geedka salkiisa ku jira. Hooyadiis oo bakhti ahna wey ag taallay. Markaas ka dibna waan soo qaaday isaga liita”.
“Durbadiiba waxaan billaabay in aan saliinge caano ku siiyo maadaama uu dhallaan ahaa. Markii uu soo tabareystayna waxaan u sameeyey weel gooni ah oo uu caanaha ku cabo. Muddo ka dib markii uu korayna waxaan ku billaabay in aan hilib siiyo”, ayuu yiri Bashiir oo hadlayey tacabkii uu geliyey haramacadkii rajayga ahaa.
Bashiir oo ka hadlayey habdhaqanka haramacadka uu korsaday, ayaa sheegay in uu qoorta xarig uga xiray si uusan u baxsan, maadaama uu bahalku asal haan duurjoog ahaa. Sidaas oo ay tahayna uu si wacan ula qabsaday nolosha qoyska islamarkaana uu xoolaha iyo carruurta iskala ciyaari jirey.
Muddo labo sano ah oo uu daryeelayey ka dib, Wakaaladda KWS ayaa ka war heshay xawaanka dadka la nool, babadeedna kala wareegtay iyadoo u cuskaneysa Xeerka Ilaalinta iyo Maamulka Xayawaanka Duurjoogta oo mamnuucaya in rabaayad ahaan loo haysto xawaan duurjoog ah.
Bashiir oo wax laga weydiiyey sida uu dareemay markii laga qaatay haramacadkii uu soo korsaday ayaa sheegay in uu isagu dowladda ku wargeliyey in uu bahalka yar hayo, islamarkaana uu ku faraxsan yahay in uu noloshiisi dabiiciga ahayd ku koro. Balse wuxuu dhanka kale niyadjab ka muujiyey in dowladdu aysan siin magdhowgii uu mudnaa, maadaama ay iska kaxaysatay xawaan uu ku soo tiil iyo tacab beelay.
“Nimankii ii yimid waxay ii sheegeen in maadaama aan bahalka koriyey muddo 2 sano iyo 3 bilood ah, islamarkaana uu iga qabo xoolo aan ka yareyn 13 neef oo aan u qalay, xaquuq aan ku leeyahay, sidaas darteedna marka Nairobi la geeyo oo la baaro dib la igala soo hadli doono. Laakiin sidii horayba loo yiri ‘aqli dowlo iyo indho quraanjo midna lama arkee’, weli waxba kama hayo”.
Hayadda Duurjoogta oo ka hadlaysey halka uu ku dambeeyey haramacadkii yaraa waxay sheegeen “in ayadoo la ilaalinayo xaquuqda xayawaanka duurjoogta ah u leeyihiin ku negaanshaha bay’ada dabiiciga ah, hadda lagu hayo iyadoo loo carbinayo in uu nolosha duurka la qabsado.
