Digniin ay dadka reer Sweden ka heleen labada sarkaal ee ugu sareeya difaaca dalkaas si ay ugu diyaar garoobaan dagaal ayaa dhalisay walaac iyo eedeymo qaylo dhaan ah.
Wasiirka difaaca madaniga ah Carl-Oskar Bohlin ayaa shirka difaaca ka sheegay “in uu dagaal ka dhici karo Sweden”.
Hadalkiisa ayaa waxaa taageeray taliyaha guud ee militariga Gen Micael Byden, oo sheegay in dhammaan dadka reer Sweden ay u diyaar garoobaan maskax ahaan suurtagalnimada dagaalka.
Hase yeeshee, siyaasiyiinta mucaaradka ayaa ka soo horjeestay digniinta.Ra’iisul wasaarihii hore Magdalena Andersson ayaa u sheegtay TV-ga Sweden in iyadoo xaaladda ammaanku ay tahay mid halis ah, “Hadana ma ahan dagaal albaabka noo taagan.”
Saameynta dadka reer Sweden ay Soomaalida ku jirto ay ku yeelatay digniinta
Kaahin Axmed oo ka mid ah dadka u dhaq-dhaqaaqa Soomaalida Sweden oo BBC-da wereysi siiyay ayaa sheegay in dadka ay arrimahan digniinta ah ay aad u saameeyeen.
Baaqyada ka imaanaya madaxda ugu sareysa ee dalka Sweden ayaa ah waxa ugu badan ee walwalka ku abuuray dadka Soomaalida asalkoodu yahay ee qaatay dhalashada Sweden.
Kaahin Axmed oo ah Soomaali haysta dhalashada Sweden ayaa sheegay in khudbadii ra’iisulwasaaraha ee arrinkaan la xiriirtay ay aad u taabatay dareenkiisa.
“Sababtoo ah raysalwasaaraha khudbaddiisa waxaa ku jirtay dhalashada dalkan Sweden micneheedu ma aha baasaboor lagu dhoofo, haddii aad haysato dhalashada Sweden u diyaar-garow inaad qori qaaddo oo aad difaacdo qayimka iyo madax-banaanida dalkan Sweden,” ayuu BBC u sheegay Kaahin.
Dhanka kale wasiirka Wasiirka difaaca Carl-Oskar Bohlin ayaa arrinaan ka hadlay, isaga oo sheegay in la fududeeyo shuruudaha lagu heli karo shaqo qaran, taas oo fududeyn doonta in dadweynuhu soo galaan ciidamada.
Dhanka kale Abaanduulaha ciidamada qalabka sida ee Sweden ayaa sheegay in waxa Ukrain ka dhacay ay sidoo kale ka dhici karaan gudaha Sweden.
“qofka waa inuu maskaxdiisa ku hayaa haddii uu halkan dagaal imaado waa inaad gurigaaga ku haysataa wax kasta oo aad u baahan tahay, wuxuu leeyahay haddii aan furinta laguu dirin waa inaad qeybtaada ka cayaarto in mushtamaca uu shaaqeeya, dhaqaatiirta iyo isbitaalada waa inay shaqeeyaan, iskuulaadka waa inay shaqeeyaan oo ay ardayda iskuulka aadaan iyadoo uu dagaal socdo,” ayaa kamid ahaa hadalo uu jeediyay abaanduulaha.
Ururka xuquuqul insaanka ee Bris ayaa sheegay in khadka caawinta qaranku aanu inta badan helin wicitaano ku saabsan suurtagalnimada dagaal. Laakiin toddobaadkan, waxaa kordhay wicitaanada walaaca leh ee ka imanaya da’yarta arkay warbixinnada wararka ama qoraallada TikTok ee ka hadlaya arrintaas.
“Tani si wanaagsan ayaa loo diyaariyey, ma ahayn wax la qariyay,” ayay afhayeenka Bris Maja Dahl u sheegtay BBC. “Waxay ahayd inay sheegaan macluumaadka loogu talagalay carruurta marka ay la sheegayaan macluumaadka noocan ah ee dadka waaweyn.”
In kasta oo fariimahani ay aad u xooggan yihiin, haddana hadalka ka soo yeedhay wasiirka difaaca madaniga ah iyo taliyaha ciidammada ayaa loo arkaa mid baraarujin ah.
Wasiirka Difaaca madaniga ah ee Sweden ayaa sheegay in ujeedadiisa aysan ahayn in dadku hurdada u diido, balse ay tahay in la ogaado waxa dhabta ah ee jira.
Taliyaha ayaa sheegay in hadalkiisa uusan ahayn wax cusub.
In ka badan laba qarni oo nabad ah ka dib, Sweden ayaa dhowr tillaabo u jirta inay ku biirto isbahaysiga difaaca ee Nato, iyadoo sugaysa jawaabta baarlamaanka Turkiga, ka dibna Hungary.
Taliyaha ayaa sheegay in hadalkiisa uusan ahayn wax cusub.
Waxa uu bil ka hor booqday jiidda bari ee Ukraine, Sweden waxa ay ka mid tahay koox dalal ah oo tababara duuliyayaasha Ukraine. Stockholm ayaa sidoo kale la sheegay inay ka fikirayso inay diyaarado dagaal u dirto Ukraine.
Oscar Jonsson, oo ah khabiir ka tirsan Jaamacadda Difaaca Sweden, ayaa sheegay in inkasta oo dagaalku yahay suurtagal, haddana ay u baahan tahay dhowr arrimood oo kala ah: Dagaalka Ruushka ee Ukraine oo sii dhammaanaya, ciidankooda oo haysta waqti ay dib u dhistaan oo ay dib ugu soo ceshadaan awooddooda dagaalka iyo in Yurub ay lumiso taageerada milatari ee Maraykanka.
