Kuuriyada Koofureed waa mid ka mid ah dalalka ugu ba’an caalamka dhanka hurdo la’aanta
Dalka Kuuriyada Koofureed waa mid ka mid ah dalalka adduunka ee inta badan dadkoodu ay hurdo la’aan heyso, taasna waxay saameyn ballaaran ku yeelatay bulshada dalkaas.
Ji-Eun ayaa waxaa soo wajahday hurdo la’aan kaddib markii saacadaha shaqada xafiiskeeda ay aad u dheeraadeen heer ay gaarto inaysan helin waqti ay ku nasato.
Celcelis ahaan waxay shaqeyn jirtay laga soo bilaabo 07:00 ilaa 22:00 balse waxay ahaayeen maalmo aad u mashquul badan. Gabadhan oo 29 jir ah kana shaqeysa xiriirka bulshada ayaa waxay mararka qaar xafiiska ku gaari jirtay ilaa saddexda habeennimo.
Ninka madaxda u ah ayaa inta badan soo waca saqda dhexe, isagoo ka codsanaya inay qabato shaqooyin.
“Waanba illaaway sida loo nasto,” ayay tiri.
Xarunta Dream Sleep Clinic oo ku taalla degmada the glitzy Gangnam ee caasimadda Seoul, Dr Ji-hyeon Lee, oo ah dhaqtarad ku takhasustay hurdada, ayaa waxay sheegtay inay aalaaba la kulanto macaamiil qaata ilaa 20 kaniiniyada huradada ah.
“Mar walba waqti ayay qaadataa inaad huruddo, balse dadka Kuuriyaanka ah waxay doonayaan inay durba hurdaan marka waxay cunaan daawo,” ayay tiri.
La qabsiga kaniiniga hurdada waa wax guud ahaan dalkaas laga yaqaanno. Ma jiraan tiro rasmi ah, balse waxaa lagu qiyaasaa in ilaa 100,000 oo Kuuriyaan ah ay la qabsadeen kaniiniyada hurdada.
Marka iyagoo kaniiniga hurdada liqay haddana aysan weli seexan karin waxay u weecdaan dhanka daroogada – taas oo ay ka dhalan karaan dhibaatooyin caafimaad
”Dadku iyagoo soconaya ayay hurdaan. Waxay furaan faranjeerka iyagoo waxyaabo badan cuna, iyagoon is ogeyn, xitaa cunto cayriin ah,” sida ay sheegtay Dr Lee. ”Waxaa xitaa jiray kiisas ku saabsan shil gaari oo ka dhacay bartamaha Seoul kaas oo uu sababay qof isagoo socda hurdayay.”
Dr Lee ayaa la kulantay bukaanno u sheegay in tobnaan sano kahor ay ugu dambeysay inay saacado yar hurdaan habeenkii.
”Way ooyaan [balse] weli rajo ayay qabaan [marka ay halkan yimaadaan]. Dhabtii waa xaalad murugo leh,” ayay tiri.
Shaqo xad dhaaf ah, walbahaar iyo hurdo la’aan
Kuuriyada Koofureed waa mid ka mid ah dalalka ugu daran adduunka ee dadkoodu ay hurdada ku dhibban yihiin. Sidoo kale waxaa aad ugu badan dadka iska dila marka la eego dalalka horumaray, iyo dadka daroogada aadka u isticmaala kuna nool daawooyinka looga hortago walbahaarka.
Waxaa jira sababo taariikhi ah oo loo aaneynayo xogahan.
Tobnaan sano gudahood dalkaas ayaa wuxuu ka baxay mid ka mid ah dalalka ugu saboolsan dunida wuxuuna noqday mid ka mid ah dalalka dhanka teknolojiyadda ugu horumarsan caalamka.
Dalalka ay isku midka yihiin, sida Sacuudiga iyo Imaaraatka Carabta, waxaa loo aaneyn karaa kheyraadkooda dabiiciga ah, balse Kuuriya ma laha kheyraad noocaas oo kale ah oo qarsoon. Waxay isbeddel u sameysan iyagoo cuskaneysa bulshada go’aanka adag qaatay ee waddaniyaddu ay ku riixeyso inay si adag oo dhaqsi ah u shaqeeyaan.
Mid ka mid ah sababaha hurdo la’aanta ay ugu dhacday dadka Kuuriyada Koofureed ayaa ah inay aad u shaqeeyaan, ay walbahaarsan yihiin hurdaduna ku yar tahay.
Haatan, shirkad dhan ayaa ka shaqeysa caawinta dadka aan hurdi karin – iyadoo shirkaddan qiimaheeda lagu qiyaasay $2.5bn sanadkii 2019.
Shirkadda caawinaadda hurdada
Magaalada Seoul, dukaamo dhan ayaa waxaa lagu iibiyaa waxyaabaha hurdada dadka ka caawiya, sida go’yada sariiraha iyo barkimo hurdada ku fiican, halka farmashiyeyaasha ay qeybo dhan u qoondeeyeen waxyaabaha dhirta laga sameeyay ee hurdada gacan ka geysta.
Waxaa haddana jira qaabab teknolojiyadeed oo hurdo la’aanta wax looga qabanayo. Labo sano kahor Daniel Tudor ayaa sameeyay app-ka khalwada – Kokkiri – oo looga gol leeyahay inuu caawiyo da’ yarta Kuuriya ee walbahaarsan.
Inkastoo dadka Kuuriya ay taariikhiyan heystaan diinta Buddhism-ka, haddana da’ yarta ayaa u heysta in habka khalwada uu yahay mid duug ah oo uusan ahayn wax qof ka shaqeynaya xafiis ku yaalla Seoul uu sameyn karo. Daniel ayaa sheegay inuu ku qasbanaaday in da’ yarta Kuuriya uu khalwada uga dhigo fakrad Galbeedka ka timid si uu ugu soo jiito.
Waaxo dhaqameed badan ayaa sidoo kale ku soo biiray ololahan.
Hyerang Sunim wuxuu ka tirsan yahay macbad ku yaalla Seoul halkaas oo dadka ay hurdo la’aantu heyso ay ku sameyn karaan khalwada.
Markii hore, waxaa meelo loo qoondeeyay dadka howlgabka ah ee doonaya inay diintaas bartaan kuna duceystaan. Haatan dadka taga macbadyadaas waa da’ yar shaqeeya. Balse waxaa lagu eedeeyay macbadyadan inay faa’iido ka sameeyaan arrintaas.
”Dabcan waxaa jira walaac… balse waxaan filayaa in faa’iidooyinku ay ka badan yihiin,” ayuu yiri Hyerang Sunim.
”Markii hore way yareyd in la arko da’ yar tagaya macbadyada oo baraya diinta Buddhism-ka. Wax badan ayayna ka faa’iidaan joogitaankooda macbadka.”
Baahida loo qabo isbeddel dhab ah
Lee Hye-ri, oo tagtay mid ka mid ah macbadyadaas kaddib cadaadis badan oo ay kala kulantay shaqada, ayaa sheegtay inay baratay sidii ay u qaadan lahayd mas’uuliyadda walbahaarkeeda.
”Wax walba aniga ayay iga billowdaan, dhammaan dhibaatooyinka aniga ayay iga bilowdaan. Taasi waa waxa aan halkan ka bartay.”
Balse in xalka walbahaarka iyo hurdo la’aanta loo arko wax uu qofku keligii la tacaali karo ayaa dhibaato ah.
Dadka aaminsan in dhibaatada ay sababeen dhaqanka shaqada iyo cadaadiska bulshada ayaa cambaareeya habkan shakhsiga ah iyagoo sheegay inay keeneyso in eedda la saaro dhibbanaha. Waxay qabaan in khalwada iyo nasashadu ay yihiin wax qofka caawinaya balse xal dhab ah uu keliya imaan karo isbeddel waxtar leh oo lagu sameeyo bulshada.
