Waxaa wali taagan is-qabqabsiga u dhaxeeya madaxweynaha Mareykanka, Donald Trump iyo Ilhaan Cumar oo Minesota ku matasha aqalka Kongreska ee dalka Mareykanka.
Ilhan Cumar oo uu madaxweyne Trump ugu baaqay inay iscasisho ama ay isaga baxdo guddiga arrimaha dibadda ee aqalka Kongres-ka ayaa saacado kadib ka jawaabtay hadalki Trump.
“Waxaad la timid naceyb waligaaba kuugu jirtay oo aad u qabto Yuhuuda, Muslimiinta, muhaajiriinta, dadka madowga iyo dadka loogu yimid Mareykanka, waxaan wax ka bartay dad hadalkeygu uu noolashoodu saameeyay ee adigu gormaad wax ka baran?”. Sidaasi waxaa barteeda Twitter-ka ku qortay Ilhaan Cumar.
Ilhan ayaa sidoo kale aad uga soo hor jeedsatay nin uu madaxweyne Trump u magacaabay in uu noqdo ergeyga u qaabilsan dalka Venazuela. Waxay su’aal gelisay sida loo aamini karo Elliott Abrams oo loo magacaabay dalka Venazuela oo qalalaaso siyaasadeed ay ka taagan yihiin.
Elliott Abrams oo horyimid guddiga arrimaha dibadda ee Kongres-ka oo Ilhaan ay ka tirsan tahay ayaa waxay sheegtay in aysan garaneyn sababta guddigaasi iyo shacabka Mareykanka ba ay u aamini karaan ninkan, madaama bay tiri uu horay ugu lug lahaa dhibaatooyin ka dhacay dalka Elsalvador oo horay ay uga dhaceen dagaalo sokeeye iyo arrimo la xiriira dalka Iraan.
Elliott Abrams oo ah diblomaasi rug cadaa ah, aadna looga ixtiraamo Mareykanka horay na ula soo shaqeeyay madaxweynayaasha kala ah Ronald Reagan iyo George W. Bush ayaa u muuqday nin ka xanaaqay hadaladii Ilhaan Cumar.
“Sannadkii 1991 waxaad qiratay in laba mar aad aqalka Kongreska ka qarisay maclumaad la xiriira ku lug lahaanshahaada fadeexaddii Iraan, mana garanayo sababto caddeyn walba oo aad maanta bixiiso ay run ku noqon karto”. Sidaasi waxaa Elliott Abrams u sheegay Ilhaan Cumar.
Ilhan Cumaar hadalkii ay tiri waa mid aad u xun, waxayna ila tahay inay iska casishaa aqalka Kongreska ama ay ugu yaraan isaga tagtaa xubinimada guddiga arrimaha dibadda ee aqalka,” ayuu yiri Trump.
Muranka hadda taagan ayaa yimid kadib markii lhaan Cumar ay sheegtay in xildhibanaada aqalka Kongreska ee taageersan Israa’iil ay dhaqaale ka helaan kooxaha taageera Yuhuuda, arrintaasi oo sababtay in gudoomiyaha Kongreska, Nancy Pelosi ay raali geli ka dalbato Ilhaan Cumar.
Waxaa kale oo uu sheegay in raali gelintii ay bixisay Ilhaan Cumar ay tahay mid daciif ah, oo waxaaa uu intaa raaciyay in hadalka kasoo yeeray Ilhaan uu yahay mid ay si weyn u aaminsan tahay.
Ilhaan ayaa u muuqato qof aad uga soo horjeeda qorsha walba oo uu madaxweyne Trump damac sanyahay, waxaase aan la ogeyn halka ay ku dambeyn doonto arrintan, maadaama Ilhaan ay ka tirsan tahay guddiga arrimaha dibadda ee Mareykanka oo ah mid si gooni ah u taabaneysa siyaasadha Trump iyo xulafadiisa.
