Madaxweyne ku xigeenkii hore ee Kenya, Kalonzo Musyoka, ayaa sheegay in uu kasoo jeedo mid ka mid ah qabiillada Soomaalida ee caanka ah.
Hadalkan ayuu ka jeediyay isusoobax siyaasadeed oo uu uga qayb galay magaalada Habasweyne ee ismaamulka Wajeer, halkaas oo uu booqday isbuucii lasoo dhaafay.
Erayadiisa ayaa abuuray hadal-hayn aad u ballaaran oo maalmihii lasoo dhaafay qabsatay baraha bulshada.
Mr Musyoka oo ka mid ah siyaasiyiinta ugu magaca wayn dalka Kenya, uguna taageerada badan, ayaa fagaaraha uu ka khudbeynayay oo ay dadweyne aad u badan isugu imaadeen ka sheegay in qabiilkiisa – oo lagu magacaabo Wakamba – “looga yaqaanno Soomaaliya Digil iyo Mirifle”.
Waxaase hadalladiisa ay u muuqdeen kaftan uu la wadaagayay Soomaalida badan ee ku sugnayd goobta uu ka hadlayay.
Khudbadda uu arrintan ku sheegay ayuu sidoo kale uga hadlay in xiriirka Kenya iyo Soomaaliya uu yahay mid aad u wanaagsan.
“Hadda waxaan leennahay dowlad saaxiib la ah Muqdisho. Xitaa Madaxweyne Uhuru maalin dhawayd wuxuu u tagay halkaas caleema saarka madaxweynaha cusub ee Soomaaliya.
“Aniga arrimaha Soomaaliya waxaan ka shaqaynayay tan iyo markii aan ahaa wasiirka arrimaha dibadda. Aniga waxaan iri dadka Wakamba-da ah ee dhinacaas waxaa lagu magacaabaa Digil iyo Mirifle,” ayuu yiri Musyoka.
Tani waxay ka dhigan tahay in Kalonzo Musyoka uu hadalkiisa ula jeedo in isaga qudhiisa uu “kasoo jeedo Digil iyo Mirifle”, isagoo sidoo kale ka hadlay qabiillo kale oo Soomaalida ka tirsan oo uu bartay.
Siyaasigan oo muddo dheer olole ka waday Kenya ayaa hadda ku guda jira ololaha doorashada bisha August la filayo in ay ka dhacdo Kenya.
Markii ugu horraysay sanadkan waxa uu ka maqan yahay tartanka booska madaxweyne ku xigeenka Kenya oo uu dhowr jeer oo lasoo dhaafay u hanqal taagayay isagoo la safan musharaxa hadda u taagan kursiga madaxweynaha, Raila Odinga.
Mr Odinga ayaa markan ku xigeenkiisa u xushay haweeney rug caddaa siyaasadeed ah oo lagu magacaabo Martha Karua, taasoo noqon doonta gabadhii ugu horraysay ee xilka Madaxweyne ku xigeenka ka qabata Kenya, haddii uu guulaysto Raila Odinga.
Loollan adag ayuu Odinga kala kulmayaa murashaxa kale ee sida wayn ugu cad cad doorashada, William Ruto.
Waa kuma Kalonzo Musyoka?
Kalonzo Musyoka waxa uu degmada Mwingi ku dhashay 24-kii bishii December ee sanadkii 1953-kii.
Waa 68 jir dhalay saddex carruur ah. Waxa uu hoggaamiyaa xisbi siyaasadeedka Wiper oo saamayn xoog badan leh.
Intii ud ahsxaysay 1993-kii ilaa 1998-kii waxa uu Wasiirka Arrimaha Dibadda ka ahaa dowladdii Daniel Arap Moi.
9-kii bishii January ee sanadkii 2008 ayaa loo doortay inuu noqdo madaxweyne ku xigeenka Kenya, xilkaas oo uu hayay ilaa 9-kii bishii April ee sanadkii 2013-kii.
