Qoys California ku nool ayuu u dhashay ilmihii ugu yaabka badnaa kadib markii la isweeydaariyay bacriminta ilmaha ee loo yaqaano IVF sida lagu sheegay gal dacwadeed maxkamad laga furey.
Lammaanaha kala ah Daphna iyo Alexander Cardinale ayaa sheegay in ay u dhalatay gabadh aanan iyaga meelnaba uga ekeyn.
Kadib markii la sameeyay baaritaan xagga hiddo sidaha ah ayaa la ogaaday in ilmahani ay leeyihiin lammaane kale, waxayna go’aansadeen in ay dib isu weeydaarsadaan carruurta.
Ma ahan markii ugu horeysay oo la isweeydaariyo bacriminta IVF.
Waa hab ugxaanta dumarka lagu bacrimiyo minada ninka, iyada oo adeegsanayo sheeybaar, ka hor inta aanan ugxaantaasi lagu talaalin ilmogaleenka hooyada.
Qoyska reer Cardinales ayaa hadda maxkamad Los Angeles ku taala la korey xarunta bacriminta ilmaha ee magaceeda yahay California Center for Reproductive Health (CCRH) iyo sidoo kale sheeybaarka VitroTech.
Dacwadda ayaa lagu eedeynayaa labadani xarumood dayacaad caafimaad iyo qarinta dambi dhacay, hase yeeshee labada shirkadadoodba wax jawaab ah BBC-da kama aysan siinin eedeymahan culus ee loo jeediyay.
Shir jaraa’id oo ay shucuur murugo badan ka muuqatay ayay maalinkii isniintii Mrs Candinale ka sheegtay in qoyskeeda ay aad uga qalbi jabeen , islamarkaasna ku jiho wareereen in ay fahmaan waxa dhacay.
“Xusuusteeda ku saabsa ilmahani inoo dhashay ayaa waligeedba ahaan doonta mid garaafaysan sababo la xiriira in ilmihii aan anaga lahayn la siiyay qof kale, ilmihii aan u halgamay in aan ifka keenana uusan ahayn keenii” ayay tiri haweenaydani.
Waxa ay Mrs Candinale dhashay gabadh midabkeedu madoowyahay, sida lagu sheegay gal dacwadeedka.
“Aad inta u naxday, ayay dhawr talaabo gadaal uga degtay miiskii umusha ee uu ilmaha saarnaa, iyada oo darbiga ku tiirsatay” ayaa lagu yiri dacwadda.
Baaritaanka DNA ayaa bilo kadib lagu ogaaday in ilmahani aysan iyagu dhalin.
Xarunta CCRH ayaa markii dambe lammaanahan ka caawisay in ay helaan qoyskii lahaa ilmaha ay dhaleen, kuwaas oo ay iyagana u dhalatay gabadh aysan iyagu hiddo ahaan lahayn.
Iyaga oo raacaya habka sharciga, ayay kala badesheen ilmihii sanadkii lasoo dhaafay.
Sanadkii 2019-kii, qoys kale oo ku nool isla California ayaa ogaaday in uu u dhashay ilmo aanan koodii ahayn, kadibna waxa ay dacweeyeen islaantii ilmahooda caloosha ku qaadday, taas oo doonaysay in ay iska haysato ilmaha ay dhashay, balse xaakim ayaa markii dambe u xukumay in ilmaha la siiyo waalidkii dhalay.
