Dhukumantiyo si qarsoodi ah loo helay ayaa daahfuray in shirkadda dawada ee Bayer oo dawooyinka ay caanka ku tahay uu ka mid yahay Aspirin ay dawooyin Malaayiin doolar qiimahoodu dhan yahay oo khatar ku ah caafimaadka ka iibisay dalal ka mid ah qaaradda Eeshiya iyo Laatiin Ameerika.
Fadeexaddan ayaa iftiimisay in shirkaddu ay badhtamihii Siddeetamaadkii dalalkan ka iibisay dawo irbado ah oo loogu talo galay in dadka qaba cudurka Xinjir-waaga (Dhiigga oo xinjiroobi waaya) ee afka qalaad lagu yidhaahdo Hemophilia iyada oo shirkaddu og in dawadan uu ku darsamay Fayraska dhaliya cudurka AIDS ka.
Shirkaddu iibka dawadan waa ay dalka Maraykanka ka joojisay sannadkii 1984kii, laakiin muddo hal sano ah ayaa ay si badheedh ah ugu
dhoofinaysay dalalka ka baxsan Maraykanka iyo Ingiriiska.Dawadan samayskeeda waxaa ku jiray dareeraha dhiigga ee lagu magacaabo plasma oo laga soo qaatay barkad kayd dhiig ah oo ay dad 10 kun ka badani ku deeqeen, laakin nasiib darradu waxa ay tahay in xilligaas aan sida imika dunida ka jirta, fiiro gaar ah loo lahayn khatarta cudurka AIDS ka isla markaana aan la samayn jirin shaybaadhada waajibka ah ee lagu garto, taas oo fududaysay in dad cudurkan qaba laga qaado dareere-dhiig oo lagu daray maaddooyinkii iyo kiimikadii kale ee dawadan laga samaynayey, taasina ay wada sadhaysay dawooyinkii oo dhan.
Lacagta ayaa kala qiimo badatay nolosha bukaanka:
Shirkaddu iyada oo ka walaacsan in ay bakhaaradeeda ku dayso kaydka dawadan wasakhowday oo aad u badnaa lacag badanina kaga jirtay, kadib markii Maraykanka iyo Ingiriiska laga mamnuucay, waxa ay bilowday in ay dunida kale gaar ahaan dalalka adeegyadooda caafimaad hooseeyaan u dirto si looga iibiyo.
Ceebta taas ka sii daran ayaa ah in shirkadda Bayer ay muddo dhowr bilood ah sii wadday soo saarista qaybo cusub oo dawadan ah oo ay ka samaynayso isla dareerahaas iyo maaddooyinkaas kale ee AIDS ku ku milmay, sababta keliya ee ku kallifaysayna waxa ay ahayd shirkadda oo arkaysay in soo saarista dawadaas wixii laga samaynayeen u dhamaystiran yahay ay ka fududahay, kana kharash yar tahay mid imika qorshaheeda la bilaabo.
In kasta oo aan tiro sugan la haynin, haddana jasiiradda Hong Kong iyo Taiwan oo keliya 100 qof oo qabay cudurka Hemophilia ayaa la xaqiijiyey in ay qaadeen cudurka AIDS ka kadib markii ay qaateen dawadan, waxaana la aaminsan yahay in tiro intaas ka badan oo kale ay u dhinteen AIDS balse aan cisbitaallada la geynin ama cisbitaalladu aanay cudurkan AIDS ka baadhin ee loo qaatay in ay xaalado kale u dhinteen.
Qaladka shirkaddan Maraykanku waa uu asturay:
Warbixin sir ah oo la helay ayaa sheegaysa in haayadda tayada cuntada iyo dawada ee dalka Maraykanku ay si badheedh ah shirkadda Bayer uga caawisay sidii sii wadista iibka dawadan iyo soo shaac bixista warkeeduba sir u ahaan lahaayeen, hawsheedana xaal mastuur lagu dhammeeyo iyada oo aanay ogaanin golaha Kongareeska Maraykanka, haayadaha caafimaadka iyo dadweynuhuba.
Warkan oo uu Geeska Afrika ka soo xigtay wargeyska New York times iyo degello wareed oo kale ayaa intaas ku daraya in shirkadda Payer ay ogeyd in dad badani u dhintaan dawadan ay ka iibiso, laakiin ay nolosha dadkaas ka door bidday faa’idada ay ku waayi lahayd haddii ay joojiso iibka dawadan, xaddi badan ayaanay u dhoofisay dalalka Malaysia, Singapore, Indonesia, Japan, Argentina, iyo dalal badan oo kale sida ku cad qoraallo la helay sannadkii 2010ka, kuwaas oo sidoo kalana caddeeyey in ay jiraan dawooyin kale oo iyagana uu samayskooda raacay dhiigga iyo dheecaannada dad qaba caabuqa beerka ku dhaca ee Jooniska noociisa Hepatitis C. oo ay shirkaddu iibisay.
Bilowgii faafitaanka cudurka AIDS ka waxaa soo baxay aragti ah in cudurkani xarun u yahay ragga Ragga isu-hammooda iyo kuwa daroogada iskaga muda xididdada dhiigga, laakiin bishii Julaay 1982kii ayaa ay aragtidaasi is beddeshay markii xarumaha xakamaynta cudurrada ee dalka Maraykanku ay sheegeen in saddex ruux oo qaba cudurka Xinjir-waaga (Hemophilia) laga helay cudurka AIDS ka. Arrintani waxa ay dareen weyn ku dhalisay xeeldheerayaasha cudurrada oo helay sabab ay ku rumaystaan in cudurkani uu ku faafay dhiig iyo walxo dhiig la xidhiidha, waxaana soo baxday in dad kale oo cudurkaa Hemophilia qabay laga helay AIDS. Shirkadda Bayer arrintan kama ay war la’ayn, waayo maamulaha qaybteeda dhiigagga ayaa warqad uu qoray si cad ugu sheegay, “Waxaa jirta caddayn xooggan oo muujinaysa in AIDS ku uu ku faafay walxo ka samaysan dareeraha dhiigga ee Plasma”
Sannadkii 1983kiina Xarunta Xakamaynta cudurrada ee dalka Maraykanka ayaa shaybaadho HIV ah oo ay samaysay kadib sheegtay in boqolkiiba 74 dadka qaba cudurka Xinjir-waaga ee isticmaalay dawadan shirkadda Bayer ee ka taallay kaydkii hore in laga helay cudur-sida HIV.
Waxaa hore u jirtay fadeexado hore oo muujiyey in shirkaddu ay intii u dhaxaysay 1898kii illaa 1910kii iibin jirtay dawooyin ay ku jiraan maandooriyeyaal ay Heroin ka mid tahay oo ay sheegtay in aan balwad ahaan jidhku ula qabsanayn.
Bayer waa shirkad caalamiya oo xarunteedu tahay dalka Jarmalka waxaana la aas-aasay sannadkii 1863kii. Bayer waxa ay soo saartaa dawooyinka dadka iyo xoolaha iyo sidoo kale qalabka caafimaadka xidhiidhka la leh. Shirkaddan waxaa rukhsadda ganacsi ee dalka Maraykanka laga qaaday intii uu socday dagaalkii labaad ee dunidu, kadib markii ay soo baxeen warar xaqiinayey in shirkad ay qayb ka ahayd oo lagu magacaabo IG Farben ka qayb qaadatay dembiyadii uu geystay taliskii Naasiga ee uu Hitler hoggaaminayey. Laakiin mar labaad oo ahayd sannadkii 1978kii ay dib u soo ceshatay madax bannaanideedii waxaana dib loogu ogolaaday rukhsaddii magaceeda ee dalka Maraykanka.
Dawada ugu magaca dheer ee ay shirkaddani samaysay waa Aspirin ka, waxa kale oo ay shirkaddani soo saartay antibiotic gii ugu isticmaalka badnaa waqtigii uu soo baxay oo ah Phenobaribital iyo Prontosil, kaas oo ay sannadkii 1939kii ku mutaysatay shahaadada caalamiga ah ee Noble Prize qaybta dawada.
Source Geeska
